PPAP បានបង្កើនល្បឿននៅក្នុងការពង្រីកផែកុងតឺន័រ
ភ្នំពេញៈ ប្រតិបត្តិករកំពង់ផែក្រុងភ្នំពេញកំពុងបង្កើនល្បឿនផែនការពង្រីកចំណតផែរបស់ខ្លួនដើម្បីធានាដល់កំណើននាវាដឹកកុងតឺន័រខណៈការដឹកទំនិញឆ្លងកាត់កំពង់ផែនេះមានការកើនឡើង។
លោក ហ៊ឺ បាវី អគ្គនាយកកំពង់ផែស្វយ័តក្រុងភ្នំពេញ (PPAP) បានប្រាប់ភ្នំពេញប៉ុស្តិ៍កាលពីម្សិលមិញថាកំពង់ផែដំណើរការដោយរដ្ឋមួយនេះបានចាប់ផ្តើមដំណាក់កាលទីពីរនៃការពង្រីកទីលានស្តុកកុងតឺន័រក្នុងដំណាក់កាលទីពីរនៃការអភិវឌ្ឍចំណតផែថ្មីមុនពេលកំណត់។ ផែនការអភិវឌ្ឍន៍ទឹកប្រាក់ ១២ លានដុល្លារនេះគឺដើម្បីបង្កើនសមត្ថភាពទ្វេដងរបស់ចំណងផែថ្មីដែលមានទីតាំងនៅខេត្តកណ្តាលនេះ។
លោកបានថ្លែងថា៖ «គម្រោងនេះបានចាប់ផ្ដើមរួចហើយកាលពីឆ្នាំ ២០១៥ ដោយសារយើងបារម្ភថាយើងនឹងមិនមានសមត្ថភាពគ្រប់គ្រាន់ក្នុងការទទួលកុងតឺន័រកាន់តែច្រើននៅឆ្នាំនេះ»។
បច្ចុប្បន្នចំណតផែកុងតឺន័រថ្មីដែលមានទីលានស្តុកកុងតឺន័រចំនួន ៤ កន្លែងមានសមត្ថភាពទទួលបានកុងតឺន័របានចំនួន ១៥ ម៉ឺនធីអ៊ីយូក្នុងមួយឆ្នាំហើយចំនួននឹងកើនឡើងទ្វេដងរហូតដល់ ៣០ ម៉ឺនធីអ៊ីយូក្នុងមួយឆ្នាំនៅដំណាច់ឆ្នាំ ២០១៨។
លោកថ្លែងថាកំពង់ផែកុងតឺន័រនេះបានទទួលកុងតឺន័រ ១៤៥ ០០០ ធីអ៊ីយូ កាលពីឆ្នាំមុនហើយវានឹងកើនឡើងទៀតនៅឆ្នាំនេះដែលលើសពីសមត្ថភាព ១៥ ម៉ឺនធីអ៊ីយូក្នុងមួយឆ្នាំ។
លោកបន្ថែមថា៖ «យើងបារម្ភថាក្នុងឆ្នាំ ២០១៦ យើងនឹងកើនឡើងដល់ ១៦ ម៉ឺនធីអ៊ីយូលើសពីសមត្ថភាពដែលយើងមាន»។
លោកបញ្ជាក់ថា PPAP នឹងប្រើប្រាស់មូលនិធិសម្រាប់អភិវឌ្ឍនៅដំណាក់កាលទីពីរនៃការពង្រីកកំពង់ផែកុងតឺន័រថ្មីនេះដែលគ្រោងបញ្ចប់ក្នុងឆ្នាំ ២០១៧។
ក្រុមហ៊ុនរកប្រាក់បាន ៥,២ លានដុល្លារដោយជោគជ័យនៅក្នុងការបោះផ្សាយមូលបត្រលក់ជាសាធារណៈលើកដំបូង (IPO) នៅលើផ្សារមូលបត្រកម្ពុជា (CSX) កាលពីខែធ្នូហើយនឹងប្រើប្រាស់ចំណូល ១៥ លានដុល្លារដែលរកបានឆ្នាំ ២០១៥ មួយផ្នែកដើម្បីអភិវឌ្ឍគម្រោងនេះ។
លោកបានថ្លែងថា៖ «យើងនឹងប្រើប្រាស់ប្រាក់ចំណូលរបស់យើងពីឆ្នាំ ២០១៥ និងបានពី IPO ដើម្បីផ្ដល់ហិរញ្ញប្បទានដល់គម្រោងនេះ។ យើងមិនត្រូវការប្រភពហិរញ្ញប្បទានផ្សេងទៀតនោះទេយើងមានគ្រប់គ្រាន់ហើយ»។
ជាមួយនឹងកំណើនការចរាចរណ៍កុងតឺន័រឆ្លងកាត់ផែពី ១០ ដល់ ២០ ភាគរយក្នុងមួយឆ្នាំកំពង់ផែនេះកំពុងសម្លឹងមើលការពង្រីកដំណាក់កាលទី ៣ ដែលនឹងបង្កើនសមត្ថភាពឆ្លងកាត់ប្រចាំឆ្នាំដល់ ៥០ ម៉ឺនធីអ៊ីយូនៅត្រឹមឆ្នាំ ២០២៨ ។ គម្រោងនេះនឹងមានទីលានស្តុកកុងតឺន័រនៅលើផ្ទៃដី ១០ ហិកតាដែលបានគ្រប់គ្រងដោយ PPAP នៅភាគខាងលិចចំណតផែដែលមានស្រាប់។
លោក បាវី បញ្ជាក់ថា PPAP កំពុងពិចារណាពីជម្រើសក្នុងការផ្ដល់ហិរញ្ញប្បទាន ៣០ លានដុល្លារដើម្បីពង្រីកគម្រោងដែលអាចបានពីកម្ចីការប្រាក់ទាប និងបន្ថែមចុះបញ្ជីលក់។
លោកថ្លែងថា៖ «ជម្រើសដំបូងនឹងចុះបញ្ជីលក់ប្រហែលពី ១០ ដល់ ២០ ភាគរយក្នុងចំណោមភាគហ៊ុនយើង [នៅលើCSX] ហើយនិងស្វែងរកដើមទុនបន្ថែមទៀតប៉ុន្តែយើងនឹងមើលជាមុនថាតើកំណើនពាណិជ្ជកម្មដូចម្ដេច និងតម្រូវសម្រាប់ការពង្រីក»។
PPAP ដែលជាប្រតិបត្តិករកំពង់ផែឈានមុខគេទីពីររបស់ប្រទេសនេះហើយក៏ជាក្រុមហ៊ុនទី ៣ ដែលចុះបញ្ជីនៅលើ CSX ដោយដាក់លក់ភាគហ៊ុន ២០ ភាគរយ៕ LA
Comments
Post a Comment